Luk 22 | BOJ | STEP | Onaqa Juda naŋgo yori bati koba jojomej. Yori bati di aqa ñam Bem Tiyosai Qaji Uyqajqa Bati. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej. Juda naŋgi deqa olo are qalqajqa yori bati agi jojomej.

Luke 22

Judas a na Yesus osim atra tamo kokba naŋgo baŋq di atqajqa deqa anjam gereiyej

1 Onaqa Juda naŋgo yori bati koba jojomej. Yori bati di aqa ñam Bem Tiyosai Qaji Uyqajqa Bati. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej. Juda naŋgi deqa olo are qalqajqa yori bati agi jojomej. 2 Deqa bati di atra tamo kokba ti dal anjam qalie tamo naŋgi ti Yesus qalsib moiotqajqa gam ŋamoqneb. Di kiyaqa? Naŋgi tamo uŋgasari naŋgi ulainjreb deqa.

3 Onaqa Satan a Judas aqa miligiq aiej. Judas aqa ñam bei Iskariot. A dego Yesus aqa aŋgro 12-pela naŋgi deqaji bei. 4 Satan a Judas aqa miligiq aisiq walawalaiyonaqa tigelosiqa atra tamo kokba ti atra tal taqato tamo naŋgi ti naŋgoq gilsiqa minjrej, “E Yesus osiy nuŋgo baŋq di atitqa niŋgi na qalqab.” 5 Degsi minjrnaqa naŋgi tulaŋ areboleboleinjrnaqa minjeb, “Ni Yesus osim gago baŋq di atimqa iga na silali emqom.” 6 Degsi minjnabqa a naŋgo anjam di qusiqa minjrej, “Di kere.” Degsi minjrsiqa gilsiq a Yesus osim naŋgo baŋq di atqajqa deqa gam ŋamoqnej. A are qalej, “Yesus a tamo uŋgasari naŋgi uratnjrsim a segi soqnimqa bati deqa e na osiy Juda tamo kokba naŋgo baŋq di atqai.”

Yesus aqa aŋgro aiyel naŋgi yori bati koba aqa iŋgi iŋgi gereiyeb

7 Ariya Bem Tiyosai Qaji Uyqajqa Bati brantej. Qotei a nami Israel naŋgi endegsi minjrej, “Niŋgi kaja du du naŋgi ñumsib siraŋmeq dia leŋ liyibqa e na unsiy niŋgi padaltŋgwasai.” Qotei a nami Israel naŋgi degsi minjrej. Kumbra deqa olo are qalqajqa yori bati brantonaqa Juda naŋgi mareb, “Yori bati brantqo. Deqa iga kaja du du naŋgi ñumsim Qotei atraiyqom.” 8 Onaqa bati deqa Yesus na aqa aŋgro aiyel Pita wo Jon wo naŋgi minjrej, “Bini yori bati koba. Deqa niŋgi aiyel aisib gago iŋgi iŋgi gereiyetgibqa iga koba na aisim iŋgi uyqom.” 9 Onaqa naŋgi aiyel na minjeb, “Ni iga merge. Iga aisim tal qabia iŋgi iŋgi gereiyqom?” 10 Onaqa Yesus na naŋgi aiyel qariŋnjrsiqa minjrej, “Niŋgi aiyel aisib qure ambleq dia tamo bei ya nobu qoboiyosim giloqnim gamq dia itosib dauryiye. Niŋgi a dauryosib tal a gogetqas qaji di miligiq gilsib tal lanja endegsib minjiye, ‘Tamo Koba a marqo, “Bini yori bati koba. Deqa e ijo aŋgro naŋgi koba na awoosim iŋgi uyqajqa warum qabi unu?” ’ 12 Niŋgi degsib minjibqa a na warum kobaquja bei gogeqsi unu di niŋgi osorŋgwas. Warum dia nami jar ti awo jaram ti ateleŋeb unu. Niŋgi aiyel aisib warum dia gago iŋgi iŋgi gereiyeleŋoiye.” 13 Onaqa naŋgi aiyel aisib anjam kalil Yesus na minjrej qaji degsi brantonab unsibqa iŋgi iŋgi kalil warum dia gereiyeleŋeb.

Yesus aqa aŋgro naŋgi koba na bem ti wain ti uyeb

14 Onaqa iŋgi uyqa bati brantonaqa Yesus aqa anjam palonto tamo 12-pela nami giltnjrej qaji naŋgi ti koba na aisib warum di miligiq gilsibqa awoosib iŋgi uyoqneb. 15 Naŋgi iŋgi uyoqnsibqa Yesus na naŋgi endegsi minjrej, “E niŋgi koba na awoosim yori bati endeqa iŋgi uyqajqa tulaŋ areboleboleibqo. Ariya iŋgi uyo koboamqa e jaqatiŋ oqai. 16 E niŋgi merŋgwai. E iŋgi endi olo uyqasai. Degsi gilsiy gilsiy mondoŋ Qotei a nuŋgo Mandor Koba soqnimqa iŋgi endi aqa utru e na geregere babtosiy olo uyqai.”

17 Osiqa a wain osiqa gambaŋq di bilentosiqa Qotei pailyosiqa aqa aŋgro naŋgi endegsi minjrej, “Niŋgi wain gambaŋ endi osib uyiye. 18 Niŋgi quiye. E wain endi olo uyqasai. Degsi gilsiy gilsiy mondoŋ Qotei a nuŋgo Mandor Koba soqnimqa e olo uyqai.” 19 Yesus a na naŋgi degsi minjrsiqa olo Qotei pailyosiqa bem osiq giŋgeŋyosiqa naŋgi enjrsiqa endegsi minjrej, “Endi ijo jejamu. E na niŋgi aqaryaiŋgwajqa deqa ijo jejamu endi niŋgi eŋgwai. Deqa niŋgi ijo jejamu osib uyiye. Bunuqna niŋgi gaigai uyoqnsib e qa are qaloqniye.” 20 Naŋgi bem uynabqa Yesus na olo wain gambaŋ osiq Qotei pailyosiqa minjrej, “Wain gambaŋ endi ijo leŋ. Nuŋgo une kobotqajqa deqa ijo leŋ aisim Qotei aqa anjam bunuj nami gereiyej qaji di siŋgilatqas. 21 Ariya niŋgi uniye. Tamo e osim jeu tamo naŋgo baŋq di atqas qaji agi iga koba na endego awoosim iŋgi uyeqnum. 22 E Tamo Aŋgro. Deqa Qotei na nami merbej, ‘Ni moiqam.’ A degsi merbej deqa e aqa anjam di dauryosiy moiqai. Ariya tamo e osim jeu tamo naŋgo baŋq di atqas qaji a tulaŋ padalougetqas.” 23 Yesus a na aqa aŋgro naŋgi anjam degsi minjrnaq qusibqa naŋgi segi segi maroqneb, “Aŋgro yai na kumbra di yqas?”

Yesus aqa aŋgro naŋgi ŋiriŋosib anjam na qotoqnsib maroqneb, “Aŋgro yai a ñam ti tigelqas?”

24 Ariya naŋgi segi segi ŋiriŋosib anjam na qotoqneb. Osib maroqneb, “Gago ambleq endena Yesus aqa aŋgro yai a ñam ti tigelqas?” 25 Onaqa Yesus a naŋgo areqalo di qalieosiqa minjrej, “Mandor kokba sawa sawa kalil taqatejunub qaji naŋgi minjiŋ na tamo uŋgasari naŋgi taqatnjroqnsibqa siŋgila na anjam minjreqnub. Yeqnabqa tamo uŋgasari naŋgi na naŋgo ñam soqtoqnsibqa mareqnub, ‘Naŋgi iga geregere taqatgoqnsibqa kumbra bole bole yeqnub.’ 26 Ariya niŋgi kumbra degyaib. Nuŋgo ambleq di aŋgro bei a ñam ti tigelqa marsimqa a mati aŋgro kiñala bulem. Osimqa a ñam ti tigelqas. Nuŋgo ambleq di aŋgro bei a tamo kobaquja tigelqa osimqa a mati nuŋgo kaŋgal tamo soqnem. Osimqa a tamo kobaqujaqas. 27 Niŋgi are qaliye. Tamo yai a tamo kobaquja? Tamo awoosiq iŋgi uyeqnu a kio? Kaŋgal tamo iŋgi suweiyosiq anaiyeqnu a kio? Tamo agi awoosiq iŋgi uyeqnu qaji a tamo kobaquja. Ariya niŋgi degyaib. Niŋgi ijo kumbra dauryiye. Agi e nuŋgo ambleq endi sosimqa niŋgi kaŋgalŋgeqnum.

28 “E gulube gargekoba qoboiyeqnamqa niŋgi e uratbosaieqnub. Niŋgi gaigai e beterbeqnub. Niŋgi keretsib e beterbeqnub. 29 Ijo Abu na e Mandor Koba atej deqa e na kamba niŋgi mandor kokba ateleŋqai. 30 Yimqa niŋgi e koba na awoeleŋosib iŋgi ti ya ti uyoqnqab. Osib niŋgi awo jaram kokbaq dia awoosib Israel naŋgo moma 12-pela naŋgo leŋ kalil naŋgi taqatnjroqnqab.”

Yesus na Pita minjej, “Ni bini gisaŋoqalubtsim marqam, ‘E Yesus qaliesai.’”

31 Yesus a na aqa aŋgro naŋgi anjam degsi minjrsiq koboonaqa olo Pita minjej, “O Saimon, ni que. Ijo aŋgro kalil niŋgi dego quiye. Satan a na niŋgi uneq waiŋgwa marqo. Niŋgi siŋgila na tigelesosib e daurbqab kio e uratbosib jaraiqab kio di Satan a nuŋgo areqalo tenemtsim qalieqajqa deqa niŋgi uneq waiŋgwa marqo. Agi tamo naŋgi wit ñoqoryoqnsib damu eleŋeqnub dego kere. 32 O Pita, e ni qa gaigai endegsim Qotei pailyeqnum, ‘O Abu, ni na Pita aqa areqalo siŋgilatetimqa a e uratbqasai.’ E ni qa degsim pailyeqnum. Bole, ni mati uloŋqam. Ariya bunuqna ni olo are bulyosimqa ijoq bqam. Bosim ino was naŋgi siŋgilatnjroqnqam.”

33 Onaqa Pita na Yesus minjej, “O Tamo Koba, ni na marimqa aqo ombla tonto talq aiqom. Aisim ni marimqa aqo ombla moreŋqom.” 34 Onaqa Yesus na minjej, “O Pita, ni que. Bini tuwe anjamosaisoqnimqa ni gisaŋoqalubtsim marqam, ‘E Yesus qaliesai.’”

Yesus na aqa aŋgro naŋgi minjrej, “Niŋgi silali ti qaquŋ ti sebru ti oiye.”

35 Osiqa Yesus na aqa aŋgro naŋgi endegsi minjrej, “Nami e na niŋgi qariŋgosim merŋgem, ‘Niŋgi gilsib ijo anjam mare mare laqniye.’ Osim endegsim merŋgem, ‘Niŋgi silali ti gilaib. Nuŋgo qaquŋ aib. Siŋga taqal jigaib.’ Degsi merŋgonamqa niŋgi gileb. Gilsibqa niŋgi iŋgi bei qa truqueb e?” Onaqa naŋgi na minjeb, “Sai. Iga iŋgi bei qa truquosai.” 36 Onaqa a na minjrej, “Ariya bini e anjam bei olo beltsiy merŋgwai. Nuŋgo silali bei soqnimqa oiye. Nuŋgo qaquŋ bei soqnimqa di dego oiye. Niŋgi sebru saiamqa nuŋgo gara jugo bei qariŋyib tamo bei na silali eŋgim dena sebru awaiyiye. 37 Niŋgi quiye. Qotei aqa anjam bei nami e qa neŋgreŋyeb qaji di aqa damu brantqas. Agi nami e qa anjam endegsib neŋgreŋyeb, ‘Tamo uŋgasari naŋgi Kristus unsib marqab, “A dego une tamo. Deqa a une tamo naŋgi koba na gaiŋesqab.” ’ Degsib e misiliŋbqab. Yimqa Qotei aqa anjam kalil nami e qa neŋgreŋyeb qaji di aqa damu brantqas.” 38 Onaqa Yesus aqa aŋgro naŋgi na minjeb, “O Tamo Koba, ni unime. Iga sebru aiyel ejunum.” Onaqa Yesus na minjrej, “Di kere.”

Yesus a Oliv manaq oqsiq dia Qotei pailyej

39 Ariya Yesus aqa kumbra gaigai yoqnej qaji di dauryosiqa Jerusalem qure uratosiq Oliv manaq oqej. Aqa aŋgro naŋgi dego a dauryosib oqeb. 40 Oqsibqa nañu agu beiq di brantosib Yesus na aqa aŋgro naŋgi minjrej, “Niŋgi endegsib pailyiye, ‘O Abu, gulube bei gagoq di brantosim iga uneq waigaiq.’” 41 Yesus a degsi minjrsiqa naŋgi uratnjrsiq kiñala sasalej. Tamo bei na meniŋ waiyim isaq yala gilqas dego kere a sasalosiqa siŋga pulutosiq Qotei pailyej. 42 A endegsi pailyej, “O Abu, ni na marimqa gulube endi e qa baiq.” Degsi pailyosiqa olo urur are qalsiq endegsi pailyej, “Uŋgum, ni ijo areqalo dauryaim. Ni ino segi areqalo dauryosim ye.”

43 Yesus a degsi siŋgila na Qotei pailyoqnsiqa a are tulaŋ gulube kobaiyej. Onaqa a ŋeskobaiyosiqa aqa ŋes leŋ ti mandamq aioqnej. Deqa laŋ aŋgro bei aisiqa Yesus taqysiqa aqa areqalo olo siŋgilatetej. 45 Yesus a pailyosiq koboonaqa a olo tigelosiqa aqa aŋgro naŋgo areq aisiq unjrej, naŋgi are gulube na ŋereŋesoqneb. Deqa minjrej, “Niŋgi kiyaqa ŋereŋejunub? Niŋgi tigelosib Qotei pailyiye. Yim gulube bei nuŋgoq di brantosim niŋgi uneq waiŋgo uge.”

Judas na Yesus osiq jeu tamo naŋgo baŋq di atej

47 Ariya Yesus aqa aŋgro 12-pela naŋgi deqaji bei agi Judas a na qaja tamo gargekoba naŋgi joqsiqa Yesus aqa areq di branteb. Brantonabqa Judas a Yesus aqa areq bosiq kundoqyej. 48 Kundoqyonaqa minjej, “O Judas, ni bosim e Tamo Aŋgro e kundoqbonum e? Yim qaja tamo naŋgi e qa qalieosib ojqajqa deqa.”

49 Onaqa qaja tamo naŋgi brantosib baŋ waiysib Yesus ojqa laqnabqa aqa aŋgro naŋgi di unsibqa Yesus minjeb, “O Tamo Koba, ni na marimqa iga gago sebru osim tamo naŋgi di ñumnam moreŋqab.” 50 Degsi minjsibqa aqa aŋgro bei na aqa sebru osiqa atra tamo gate aqa kaŋgal tamo bei gateq di qalqajqa waiyej grotosiqa dabkala wo segi gentetej. 51 Onaqa Yesus na aqa aŋgro naŋgi minjrej, “Kumbra degyaib. Uratiye.” Degsi minjrsiqa tamo di aqa dabkala ojnaqa olo boleej.

52 Osiqa atra tamo kokba ti atra tal taqato tamo naŋgi ti Juda tamo bole bole ti naŋgi minjrej, “E leŋ ojo tamo deqa kio niŋgi sebru ti torom ti eleŋosib e ojqa bonub e? 53 E nami koba atra tal miligiq dia niŋgi koba na sosim anjam merŋgoqnem bati deqa niŋgi yala baŋ waiysib e ojosai. Ariya bini nuŋgo bati brantqo. Endego ambru aqa siŋgila agi brantqo.”

Pita a marej, “E Yesus qaliesai.”

54 Yesus a na naŋgi degsi minjrnaqa naŋgi a ojsib walwelosib atra tamo gate aqa talq osi gileb. Naŋgi Yesus osi gileqnabqa Pita a kiñala isa isaq na naŋgi daurnjrsiq gilej. Gilsiqa atra tamo gate aqa tal meq di brantej. Brantosiqa naŋgi koqnjroqnej. Naŋgi Yesus kieryib unqajqa deqa qaja tamo qudei naŋgi tal meq di ŋam tuŋguyosib awesonabqa bosiq naŋgi koba na ŋam yoroqnej. 56 Pita a ŋamyuo areq di awesonaqa kaŋgal uŋa bei na unsiqa koqyosiq qaja tamo naŋgi minjrej, “Tamo endi Yesus ombla soqneb.” 57 Onaqa Pita a saidosiq minjej, “Uŋa, e tamo di qaliesai.” 58 Sokiñalaynaq tamo bei na olo Pita unej. Unsiqa minjej, “Ni dego Yesus aqa aŋgro bei.” Onaqa Pita na minjej, “E aqa aŋgro sai.” 59 Olo kiñala soboleiyonaq tamo bei na Pita koqyosiqa tamo naŋgi dia soqneb qaji siŋgila na minjrej, “Tamo endi a dego Galili qaji tamo. Deqa e qalieonum, a Yesus dauryoqnej qaji.” 60 Onaqa Pita na minjej, “Ni anjam maronum di e poibosai bolesai.” Degsi minjnaqa tuwe anjamej. 61 Tuwe anjamonaqa Tamo Koba Yesus a bulosiqa Pita koqyonaqa anjam nami Yesus na minjej qaji, “Bini tuwe anjamosaisoqnimqa ni gisaŋoqalubtsim marqam, ‘E Yesus qaliesai,’” anjam deqa olo are qalsiqa poiyonaqa tal qalaq gilsiqa tulaŋ akamugetej.

Naŋgi na Yesus misiliŋyoqnsib baŋ na qaloqneb

63 Ariya tamo Yesus ojeb qaji naŋgi a osi gilsibqa atra tamo gate aqa tal miligiq dia a misiliŋyoqnsibqa baŋ na qaloqneb. 64 Baŋ na qaloqnsibqa aqa ŋamdamu gara na qosetosib minjoqneb, “Ni Kristus amqa ni ubtsim mare, yai na ni lumqo?” 65 Degsib minjoqnsib olo misiliŋ anjam gargekoba minjoqneb.

Juda tamo kokba naŋgi koroonabqa qaja tamo naŋgi na Yesus osi bosib naŋgo ulatamuq di tigelteb

66 Onaqa nobqolo malu qameqnaq Juda gate kokba ti atra tamo kokba ti dal anjam qalie tamo naŋgi ti bosib koroonabqa qaja tamo naŋgi na Yesus osi bosib naŋgo ulatamuq dia tigeltonabqa Juda tamo kokba naŋgi na nenemyeb, 67 “Ni Kristus amqa geregere merge.” Onaqa a na minjrej, “E Kristus degsi merŋgwai di niŋgi ijo anjam di quetbqasai. 68 E anjam bei nenemŋgwai di niŋgi ijo anjam di dego quetbqasai. 69 Deqa e niŋgi endegsi merŋgwai. Bunuqna e Tamo Aŋgro laŋ qureq oqsiy Qotei siŋgila koba ti unu qaji aqa baŋ woq dia gaigai awesqai.”

70 Yesus a naŋgi degsi minjrnaqa naŋgi na nenemyeb, “Deqa ni Qotei aqa Ŋiri e?” Onaqa a na kamba minjrej, “Od. Agi niŋgi na maronub di kere.” 71 Onaqa naŋgi Yesus aqa anjam di qusib tulaŋ minjiŋ oqetnjrnaqa segi segi maroqneb, “Aqa une agi a segi babtqo iga quonum. Deqa kiyaqa tamo bei olo metonam bosim aqa une marqas?”